Wapi neno mwanana hutumika?

Mtu mwanana, mti mwanana, upepo mwanana, LAKINI Kiswahili chanana, nyumba nyanana. Mzizi wa sifa hii ni -anana. Kwa hivyo, inahitaji kiambishi awali cha jina la kitu kinachopawa sifa. Najua kwamba kuna wengi watumiao “mwanana” kwa kila ngeli. Kwa maoni yangu, hicho si Kiswahili fasaha.

Nilipokuwa mdogo, nilikuwa nikiwasikia wazee wakiitumia sifa hiyo, -anana, kwa vitu vinavyohisika, vinavyodirikika, au vinavyoonekana kwa akili au kwa hisia. Kwa mfano, upepo mwanana (upepo unaopuliza  kwa upole na utulivu); sauti nyanana (sauti nzuri inayopendeza masikioni na kuburudisha); ngozi nyanana (ngozi nyororo); maji manana (maji yaliyotuwama au kutiririka kwa upole); mtu mwanana (mtu mpole, mwenye tabia nzuri na maingiliano mazuri na wenziwe).

Ni katika utuuzimani mwangu ndipo nilipoisikia sifa hiyo ikitumiliwa karibu kila kitu. Ndipo tukawa twasikia, au kusoma, nyumba nyanana, gari lanana, na kadhalika.

Hayo ndiyo niwezayo kuyaeleza kwa ufupi.